Feb 07

ඇලෝසියස් හා උදයංග ඇල්ලීම රඟපෑමක් -ජවිපෙ

anura-kumara-speaks
අර්ජුන් ඇලෝසියස් සහ උදයංග වීරතුංග අත්අඩංගුවට ගැනීම කල් තියා සකසන ලද පිටපතකට අනුව සිදු වු රංගනයක් බවට ජනතා විමුක්ති පෙරමුණ චෝදනා කරයි.

“සී.අයි.ඩී. එකෙන් යම් කෙනෙක් අත්අඩංගුවට ගන්න හැටි අපි දන්නවා. නමුත් අර්ජුන් ඇලෝසියස් අත්අඩංගුවට ගැනීම කල්තියා සකස් කරන ලද පිටපතක් අනුව සිදුකළ බව අපිට පැහැදිලියි. උදයංග වීරතුංග අත්අඩංගුවට ගැනීමත් එහෙමයි.” ජවිපෙ නායක අනුර කුමාර කියා සිටියේය.

උදයංග වීරතුංග හිටපු ජනපති සහ හිටපු අමාත්‍යවරයෙකු සමඟ විදෙස් සංචාරයක නිරත වන ආකාරය ද පසුගිය දින වල දුටු බව කී අනුර කුමාර දිසානායක මෙම අත්අඩංගුවට ගැනීම මැතිවරණය වෙනුවෙන් කරන ලද්දක් බවට 06 අඟහරුවාදා පැවති මාධ්‍ය හමුවකදී චෝදනා කළේය.

ජනාධිපතිවරයා අවංක ලෙසම දූෂණ එරෙහිව පෙනී සිටින්නේ නම් ඔහුම පත්කළ කොමිෂන් සභා වාර්තා අනුව විශාල පිරිසක් අත්අඩංගුවට ගැනීමේ හැකියාව ඇති බව ද ජවිපෙ නායකයා පෙන්වා දුනි.

මහා පරිමාණ වංචා-දූෂණ සම්බන්ධයෙන් ඇතැම් ආයතනවල වාර්තා ජනාධිපතිවරයාට ලබාදී අවුරුදු 2ක් පසුවී ඇති බව කී අනුර කුමාර දිසානායක මැතිවරණ සමයේ මේ හඹාගෙන යන්නේ ඇත්ත වශයෙන්ම දුෂණ විරෝධි ගමනක් නොවන බව ද කියා සිටියේය.

“ජනාධිපති කොමිෂමෙන් හෙළිවී තිබෙන දූෂිතයන් අරගෙන ජනාධිපතිවරයාගේ මැතිවරණ බල ඇණිය ශක්තිමත් කරගෙන තිබෙනවා. අම්පාර දැයට කිරුළ වංචා සම්බන්ධයෙන් ප‍්‍රධාන චූදිතයෙක් වන නලීන් ඉන්දික දැන් ජනාධිපතිවරයාගේ මැතිවරණ ව්‍යාපාරයේ ඉන්නවා. මේ වගේ ගණනාවක් පිරිවරාගෙන දූෂණ විරෝධය ගැන කතා කළාට වැඩක් නැහැ. මේ දේශපාලන සංස්කෘතිය වෙනස් කළ යුතුයි” ජවිපෙ නායක අනුර කුමාර වැඩි දුරටත් ප්‍රකාශ කළේය.

Leave a Reply

Your email address will not be published. Required fields are marked *