Feb 02

රටක් ආන්දෝලනයට ලක් කළ ලසන්ත ඝාතනය සම්බන්ධයෙන් හිටපු පොලිස්‌ ලොක්‌කෙක්‌ අත්අඩංගුවට

lasantha-wickrematunge
සන්ඩේ ලීඩර් ප්‍රධාන කර්තෘ ලසන්ත වික්‍රමතුංග මහතා ඝාතනය කිරීමේ සිද්ධිය සම්බන්ධයෙන් එවකට ගල්කිස්‌ස පොලිසියේ අපරාධ අංශයේ ස්‌ථානාධිපතිවරයාව සිටි තිස්‌ස සුගතපාල මහතා අපරාධ පරීක්‍ෂණ දෙපාර්තමේන්තුව මගින් ඊයේ (01 දා) අත්අඩංගුවට ගෙන තිබෙන බව පොලිසිය පවසනවා.

ලසන්ත ඝාතන සිද්ධියට අදාළ රහසිගත තොරතුරු රැසක්‌ වසන් කිරීම, සාක්‍ෂි විනාශ කිරීම, විමර්ශන නිසියාකාරයෙන් ක්‍රියාත්මක නොකිරීම ඇතුළු චෝදනා රැසක්‌ සැකකාර හිටපු පොලිස්‌ පරීක්‍ෂකවරයා වෙත එල්ල වී ඇති බව පොලිස්‌ මූලස්‌ථානය පවසන්නේ.

සැකකාර තිස්‌ස සුගතපාල මහතා පැය 48 ක්‌ රඳවාගෙන ප්‍රශ්න කිරීමට අපරාධ පරීක්‍ෂණ දෙපාර්තමේන්තුව අධිකරණයෙන් අවසර ලබාගෙන තිබෙන බවත් සදහන්. පොලිස්‌ පරීක්‍ෂක තිස්‌ස සුගතපාල මහතා අවස්‌ථා කිහිපයකදීම අපරාධ පරීක්‍ෂණ දෙපාර්තමේන්තුව හමුවේ පෙනී සිටින ලෙස දැනුම් දී තිබුණද ඒ මහතා එහි පෙනී සිට නැහැ. ඒ අනුව විශේෂ පොලිස්‌ කණ්‌ඩායමක්‌ ඊයේ (01 දා) ඒ මහතාගේ නිවස වටලා ඔහු අත්අඩංගුවට ගෙන තිබෙනවා.

2009 වර්ෂයේ ජනවාරි 08 වැනිදා ලසන්ත වික්‍රමතුංග මහතා සිය මෝටර් රථයෙන් යමින් සිටියදී ගල්කිස්‌ස අත්තිඩිය මලගල කනිෂ්ට විද්‍යාලය ඉදිරිපිටදී නාඳුනන සන්නද්ධ කණ්‌ඩායමක්‌ විසින් ඔහු ඝාතනය කර තිබෙන අතර එවකට තිස්‌ස සුගතපාල මහතා අපරාධ අංශයේ ස්‌ථානාධිපතිවරයා ලෙස කටයුතු කරමින් සිටි බවත් සදහන්. 2009 වර්ෂයේ ජනවාරි 16 වැනිදා සැකකාර පොලිස්‌ පරීක්‍ෂකවරයා ලසන්ත ඝාතන සිද්ධියට අදාළ සාක්‍ෂි රැසක්‌ විනාශ කර දැමූ බවට අපරාධ පරීක්‍ෂණ දෙපාර්තමේන්තුව විසින් අනාවරණය කරගෙන තිබෙන අතර තිස්‌ස සුගතපාල මහතා මේ වන විට වෙනත් සිද්ධියක්‌ සම්බන්ධයෙන් වැඩ තහනමකට ලක්‌ව සිටින බවත් සදහන්.

 

Leave a Reply

Your email address will not be published. Required fields are marked *